Die passie van die planteters

Pythagoras, Leonardo da Vinci, Mahatma Ghandi, Franz Kafka, John Harvey Kellogg en Leo Tolstoy is lede van ’n klub. Wie wil nie onder sulke geselskap getel word nie?

Al wat jy hoef te doen, is om op te hou vleis eet. Hulle is almal vegetariërs. Hulle, en rofweg 624 miljoen ander, want na raming is 8% van die wêreldbevolking vegetaries. Baie van hulle is dit nie soseer uit oortuiging nie as uit armoede. As daar kans is om vleis te eet, sal hulle. Meesal is daar nie kans nie.

Die Grieke, byvoorbeeld. Tot enkele dekades gelede was die enigste vleis wat baie eilanders – almal hondarm – geëet het, die Paaslam een keer per jaar...