’n Verhaal wat kronkel verby diamante en ANC-konneksies tot by SA lyke in die stof

IN Bangui, het die bebaarde rebellebevelvoerder met 'n veraf kyk gesê, lê die diamante gesaai op die grond, jy kan die blink klippies sommer by die handevol optel. Onder die krat waarop hy langs die vuur gesit het, het die bierblikke begin opstapel, en daarmee saam het sy tong al hoe losser en sy uitsprake meer vergesog geraak in die dik donkerte wat aan die einde van elke dag so plotseling oor die ewenaar neersak. 

Bangui, die hoofstad van die Sentraal-Afrikaanse Republiek (SAR), was sowat 200 km noord al langs die Ubangirivier van waar ons in die Dongo-gebied in die Demokratiese Republiek van die Kongo (DRK) in 'n rebellekamp in die reënwoud gesit het. Dit was Oktober 2000, en ek en kameraman Mzwandile Njokwana was in die DRK om 'n dokumentêre program vir die SAUK se Special Assignment te maak oor die rebellegroepe wat geveg het teen die regeringsmagte van Laurent-Désiré Kabila, destyds die president.

Vir die bevelvoerder langs die vuur was die waan van maklike geld in die naburige Bangui 'n ontsnaproete, weg van die oorlog waar 'n malariamuskiet of 'n vyandige mortier ewe maklik jou einde kon beteken as jou eie skietlustige troepe. ..