André P. Brink: ‘Dit was ’n helse hemel’

DIT voel of hy uit ’n groef losgemaak is, sê prof. André P. Brink (56), wat onlangs van Grahamstad na die Kaap verhuis het om Engelse letterkunde aan die Universiteit van Kaapstad te doseer.

“Ek voel net asof ek soos ’n fontein skielik uitbars. Dinge gebeur in my en ek doen dinge nuut en ek wil nuwe dinge doen. Van die letterkunde het ek die laaste ses maande meer geleer as in die vorige 28 jaar. Eers as mens ná 30 jaar iets heeltemal drasties nuuts doen, besef jy wat ’n vernuwing dit in jou denke kan beteken."

Brink was voorheen 29 jaar lank hoogleraar in Afrikaans aan die Rhodes-universiteit. Met die pos in Engels kon hy sy ideaal vervul om Kaap toe te kom. Dit het vir hom “’n soort nuwe lewe” beteken. En om die daad by die woord te voeg, verskyn sy eerste Afrikaanse roman in agt jaar in September: Die kreef raak gewoond daaraan. Hy het dit in Kaapstad voltooi. Hoewel Brink se loopbaan sedert die jare vyftig uiters produktief was (met 12 romans, verskeie toneelstukke, kortverhaalbundels, literêre werke en talle ander agter sy naam), was sy pen sedert die vroeë jare tagtig besonder stil. In 1988 is sy enigste roman uitsluitlik in Engels, States of Emergency, met heelwat kritiek ontvang en as ’n soort “eksperimentele outobiografie” afgemaak...