Kleedrepetisie vir die dood

Ja, Slagplaas was ’n omstrede manuskrip.

Tafelberg het my drie jaar lank gelek om dit vir hulle te gee, ongeag die feit dat ek ’n bloutjie met hulle geloop het met Die hemel help ons. En toe ek teen my sin, en ná ’n aanbod van ’n voorskot, uiteindelik my manuskrip vir Tafelberg gee, het hulle gesê die seksuele is te erg in sekere van die verhale; hulle wou ook nie ’n sogenaamde senior skrywer wat by hulle publiseer, op wie se briewe een van die verhale dan kwansuis gegrond is, aanstoot gee nie; en hulle het ook nie die voorskot vir my gegee nie.

Omdat Taurus toe nie meer bestaan het nie, is ek Human en Rousseau toe ... Hulle was baie geesdriftig oor die manuskrip, maar soos dit hier te lande gaan – jy weet, ’n uitgewer hier is mos nie ’n ou wat sy eie besluite neem nie, die integriteit van die skrywer word, lyk dit vir my, nie juis erken nie...