Dit gaan slegter gaan voor dit beter gaan

DIE afgelope week was niks minder nie as ’n bloedbad op wêreldmarkte. Aandelepryse oral het dramaties getuimel soos wat die uitkringende effek van die virus op ekonomieë oral duideliker geword het.

Vergelykings is getref met die wêreldwye finansiële krisis van 2007 en 2008, toe die internasionale bankstelsel amper in duie gestort het. Hierdie keer kan erger wees, veral omdat baie van die strukturele probleme wat tot die destydse krisis aanleiding gegee het, steeds bestaan. Boonop het die Amerikaanse Federale Reserweraad (die Fed) en die Europese Sentrale Bank (ESB) die likiditeitsprobleem wat weens die vorige krisis ontstaan het die hoof probeer bied met wat neerkom op ’n massiewe finansiële eksperiment – sogenaamde kwantitatiewe verruiming, wat eintlik maar ’n eufemisme is vir die kunsmatige skep van geld. Daarmee saam is rentekoerse oral tot rekordlae vlakke afgebring; in sommige lande is daar selfs negatiewe koerse.

Dié eksperiment het vir lank oënskynlik gewerk, maar die probleem nou is dat die Fed en die ESB se ammunisie feitlik op is. Dit verklaar ook waarom die ESB nie Donderdag, soos allerweë verwag is, uitleenkoerse nogmaals verlaag het nie. Die Fed het verlede week Amerikaanse uitleenkoerse as ’n noodmaatreël met 50 basispunte verlaag, maar dié keer het dit nie die dalings omgekeer soos soveel kere tevore die geval was nie...