Geleerde eiers van heinde en verre

DIE moeilikheid het in 1968 begin. Mark Kurlansky skryf boeiend daaroor in sy boek getitel 1968. In Maart kom studente in Warskou in opstand. In April open Hair op Broadway. In Junie word Bobby Kennedy geskiet. Volgend op Warskou ontplof kampusse van Berkely tot Londen tot Parys in geweld. Iets in die wêreld wil vry kom, asof ’n kuiken die eierdop wil breek.

Vir die hoendereier self, egter, gebeur die teenoorgestelde. Die Amerikaanse hartstigting maan in Februarie 1968 dat mense nie meer as drie eiers per week moet eet nie. Die konsternasie! Die omwenteling! Vir ’n goeie ses miljoen jaar al eet ons eiers. Wéét die hominiem Sahelanthropus, daar waar hy dit vir die eerste keer op sy agterpote waag, met ’n arm gestrek na die krans om dié geil kapsule uit ’n nes te roof, van die gevaar van cholesterol?

Al wat hy weet, is, dié’s kos wat nie terugbaklei nie en wat jou vol én sterk laat voel...