Die stewige buurvrou en Jerigo se mure

IN die begin was daar nie veel riglyne en regulasies nie – ook nie eintlik begrotings nie. Ons as regisseurs het idees uitgedink en dit in programme omskep; dikwels moes ons ook instaan vir siek akteurs of regisseurs wat eensklaps besluit het TV is nie vir hulle nie.

So beland ek vir ’n paar maande in die godsdiensdepartement met die opdrag om die kinderprogram Ligstraaltjies uit die Bybel te vervaardig. Bettie Kemp was die aanbieder en ons het die “gedramatiseerde” weergawes van Dawid en Goliat, Elia en die kraai, asook ander lekker stories op my plaas verfilm. Op ’n dag besluit ek toe om my hand aan ateljeedrama te waag vir die verhaal van die vernietiging van Jerigo se mure.

Die SAUK se stelbouers het ’n manjifieke model van die antieke mure om die stad Jerigo gebou. Die eindproduk was ’n indrukwekkende ringmuur kompleet met wagtorings en skanse wat soos ’n mengsel van die Kasteel die Goeie Hoop en die klipmure van die Zimbabwe-ruïnes gelyk het...