Verna Vels se tongvis à la Marlene en galgehumor vir die legendariese afgetredenes

EK het jare gelede vir Verna Vels ontmoet, maar het eers ná haar afsterwe aan borskanker in Augustus 2014 op dié juweel van ’n resep in een van haar versamelings afgekom.

Verna, en ’n groepie nabye vriende wat ’n liefde vir operamusiek gedeel het, het een maal elke maand bymekaar gekom en saam geëet. Die intieme groep legendariese afgetredenes (omroepers, skrywers, akteurs en aktrises) het hulself die Alte Kakkes gedoop. Buiten hul voorliefde vir operamusiek was hulle natuurlik gaande oor kos en reis.

Dit was ’n uithaal-en-wys-geleentheid wanneer dit jou beurt was om te onthaal. Vir wyle Wouter de Wet (radio-omroeper, tenniskommentator en aanbieder van onder meer Dis Opera, Loof die Here en U Eie Keuse) was die spanning vooraf net te veel. Hy het altyd skelmpies “tuisgemaakte” kos bestel en dit in sy eie bakke voorgesit...