Skelvis-kedgeree, forel met wyn en kreef vir die pyn

VRIND Dicky bel nou die dag om te vra hoe maak 'n mens kedgeree. En wil ek nie dit sommer kom eet ook nie? Dis 'n grou dag op hierdie baai, een van die eerste werklike winterdae – nie koud nie, net nat en triestig met 'n sterk smaak van die melancholie wat teen Oktobermaand op ons wag, wanneer jy dink dit reën al sedert Oom John eerste minister was.

Nog 'n lekker ding van eet by Dicky en Gerhard is dat hulle nie skrik vir vuurmaak nie. Die kaggel brand hoog toe ek daar aankom, Gerhard pak net houtblokke op die vuur en ons lees verstom van die vreeslike bohaai oor Joan Collins in die Sondagse geelpers (wetend dat 'n seskolom-kleurfoto op die voorblad die soort publisiteit is wat jy nie met geld kan koop nie – maar of Mies Joan sulke reklame wou gehad het, kan ons ook nie sê nie.)

En Dicky kondig aan hy het skelvis gekoop vir die kedgeree, en hoewel almal se jy braai nie uie daarby nie, staan hy gereed met die swart pan en braai sy twee uie...