Hierdie skisofrenie van my, en van my plekkie by die see

“This bizarre schizophrenia prevalent in my tribe has gone on to puzzle me all my life.” – Max du Preez in Pale Native

’N RUKKIE gelede, een oggend, help ek gou my wedermaat om haar klein koffiewinkeltjie oop te sluit en reg te kry vir die dag se handel. Dit is nie baie werk nie, een tafeltjie en twee bankies om uit te dra, die naambord teen St. Augustine-weg aan sy paal gaan hang en ’n paar swartborde met name en pryse staanmaak buite die deur.  

Gewoonlik is dit gou, ek het al ’n stophorlosie gebruik, my rekord van sleutel in slot draai tot sit en wag vir ’n koffie is 2 minute 49 sekondes. Daardie oggend was die rekord nie ter sprake nie; ek moes eers ’n present wat een of ander tik-kop hier gelos het onskadelik stel. Behalwe dat dit nie lekker ruik nie, sal ek ook voorstel die man gaan sien ’n dokter, sy dieet lyk nie goed nie...