’n Swymellekker sous deur ’n anti-sjokolis

MET verbasing staar vriendin Karin na die volkleur-koffietafelboek op my lessenaar. Sy gryp dit asof dit Madonna se seksboek is.

Waar kry jy die wonderlike ding? skree sy, en skielik drom ses mense saam en begin hyg oor die prentjies in die hoek. Madonna should be so lucky! Moenie aan die foto's lek nie, maan ek. Die boek behoort nie aan my nie, dit moet terug na my suster. En loop kry julle orgasmes iewers anders.

Dié kinky verhaal laat my terugdink aan die portefeulje van tekeninge van Paul Wunderlich wat vrind Jaco, destyds ’n kunshandelaar, eens op spec uit Duitsland bestel het. Hy kry ’n brief van die tuisgemaakte sensors hier onder by customs, in die hawe, om te sê die werk is pornografie. Jaco beleef die surrealistiese ervaring van sewe besoeke aan customs om te vra sal hulle nie asseblief die kunswerk terugstuur na Duitsland nie, dit is R7,000 werd. Uiteindelik kry Jaco die portefeulje onder oë – die tekeninge was oortrek met komkolle...