Rissiepit, my chilli love, brand jou mond van lekkerkry?

’N KAPENAAR kwyn van verlange na ’n rissie. Dis seker ons Maleise en Indiese erfenis, maar sonder ’n flenter rissie of ’n knippie chilli powder in die huis smaak kos agteruit. Nou die dag was daar weer so ’n tekort aan rissies in die Kaap, en dit het my verstom hoe ek van winkel tot winkel, van die Parade tot die stalletjie op die stasie, myle en myle loop en soek na die brandgoed vir my bredie.

Ek het al gesien hoe ’n waardige dame, op haar mooiste vir die Vrydag in die Bo-Kaap aangetrek, met die sjiffontooisel om haar gesig gevou, in Atlas Trading Company staan en ’n hele drie kilo’s rissies bestel. Die speseryehandelaar bo in Waalstraat voorsien aan omtrent die hele Skiereiland en hulle verpak meestal in groot maat.

Wat, wonder ek, gaan die tannie met al daai rissies maak? Tensy sy dit met haar skoondogters deel, natuurlik .....