Kaap vs. Jozi: Wie swaai die septer as die uiteetstad?

VRA jy die fynproewers en smulpape (met vet beursies) watter stad het die beste eetplekke in die land, kom die antwoord gewoonlik dawerend: Kaapstad! ’n Baie berese vriend wat van Johannesburg na Kaapstad verhuis het, stel dit onomwonde: “Kaapstad is per vierkante kilometer die beste stad ter wêreld om by fynproewer-restaurante te eet.” Sy een voorbehoud: Die kos is peperduur en nie altyd die ekstra prys werd nie.

Dis seker onregverdig en ’n hoogs persoonlike/subjektiewe oefening om verskillende stede se toprestaurante teen mekaar op te weeg. Sulke vergelykings verval onvermydelik in ’n provinsiale toutrekkery.

Kobus Burger, die waarnemende programbestuurder by RSG, sê pront: “Ek hou mos glad nie van die Kaapse snobisme en die feit dat die eettydskrifte en keurpanele hoofsaaklik uit die Kaap kom nie. Daarom wen die deftige restaurante van die wynplase daar elke jaar en suig Johannesburg aan die agtertiet.”..