Ouma gee Covid ’n snotklap en groei sebras van saadjies

DIE meeste bejaardes is so vol van die pille dat as jy hulle kan optel en skud, sal hulle soos ’n ratelslang klink. (Oukei, ek beveel dit nie aan nie.) My skoonma is geen uitsondering nie. 

Toe ons die nuus kry dat sy Covid-19 opgedoen het in haar bejaarde-sorgeenheid, het ons almal gevrees nou is dit “tickets”, want die statistieke tel teen haar en die pille wat bejaardes se lewe verleng, is weerloos teen Covid. As mens na die sogenaamde komorbiditeitsfaktore vir Covid-19 kyk, “tik” ouma omtrent elke boks. Demensie, bo 80 is net die top van ’n lang lys van onderliggende toestande wat sy het.

Ná die diagnose het die familie met ’n swaar gemoed en gepantser met PPE gaan kuier, waar sy in isolasie ’n paar meter van hulle in ’n bed gelê het. “Sê maar totsiens, net ingeval,” is ons aangeraai, “want mens weet nooit.” Daar was sewe bejaardes in die deel van die oord met Covid-19 en ons is meegedeel die vooruitsigte lyk nie goed nie. ..