PIET CROUCAMP | Oor zefgat politieke kragape, gebakte pere en politieke papsakke

DIS nie elke Jan Rap en sy leunstoelmaat wat kan politieke ontleding skryf nie. Nie eens (of dalk veral nie) as jy 'n mening het oor alles van hoe om steak te braai tot Donald Trump, Chrissy Teigen se kelder, die maanlanding en die sluipmoord op John F. Kennedy nie.

Eerstens – en dit klink dalk voor-die-hand-liggend – moet jy werklik weet waarvan jy praat. 'n Goeie politieke rubriekskrywer moet 'n vinger op elke pols en in elke baksel hê, skinder vanuit die binnekringe kry én dit alles met 'n gesonde dosis skeptisisme bejeën. 

As jy wil gewild wees, is dit nie die werk vir jou nie – en as jy nie almal om die beurt kwaad maak nie, doen jy dit nie reg nie. Vervelige, voorspelbare en vanielje skryfwerk is die doodskoot vir die loopbaan van enige rubriekskrywer, maar politieke skrywers se argumente moet ook weldeurdag, gesaghebbend en oortuigend wees en die feite daarin korrek. 'n Sin vir humor is onontbeerlik, asook 'n gawe met woorde en die vermoë om die leser te laat dink...