POLITIEKE NOTABOEK | Hou jou bek en luister as die ANC-base praat

AS die voetsoldate eers vir die ANC gestem het, is hulle seggenskap tot met die volgende verkiesing verby. Die topleierskap van die party neem daarvandaan al die besluite en niemand durf dit bevraagteken nie.

Die ANC se verteenwoordigers in die parlement en in provinsiale en plaaslike regerings is aan Luthulihuis se wil en wense onderworpe eerder as aan dié van die Grondwet of die eed wat hulle met hulle inhuldiging afgelê het.

Die ANC leef, die ANC lei en enigiemand wat sy leierskap se integriteit bevraagteken, is teen-revolusionêr, anti-transformasie en wil die land, met die hulp van regter Raymond Zondo, verder in ’n neo-liberale gemors laat verval. Die staat is die ANC en die ANC is die staat...