Fore! Dis afslaantyd vir die Trumpioteek

WAAROM, vra ’n kollega hier in die departement djenderstudies aan ons universiteit anderdag in die teekamer, weier sommige mense om toe te gee dat Donald Trump ook ’n paar positiewe dinge reggekry het?

Dit was nie die eerste keer dat dié soort vraag in ons geledere opduik nie, en soos gewoonlik was daar ’n heftige argument oor die onderwerp. Dr. Eckhardt Spies het dadelik uitgewys dat werkloosheid onder “swart en Hispaniese Amerikaners”, soos hy dit gestel het, onder Trump die laagste in die geskiedenis was.

Dr. Spies moes oomblikke later toegee dat die bron vir sy aanspraak dieselfde webwerf is wat onlangs berig het dat FW de Klerk tot Islam bekeer is en R30 miljoen vir ’n moskee op Potchefstroom geskenk het, en dat ons dit dus nie ernstig hoef op te neem nie...