KLIP IN DIE BOS | Dinge val uitmekaar, maar politieke partye klou aan ideologie

KORRUPSIE, geweld, onbevoegdheid en onverantwoordbaarheid is onder meer verantwoordelik vir die lae dunk wat Suid-Afrikaners van hulle openbare instellings het, soos die Afrobarometer (https://afrobarometer.org/countries/south-africa-0) ook aantoon. Dit is veral ons politieke leiers aan regering- en opposisiekant wat nie meer enige vertroue inboesem nie. Dít veroorsaak grootskaalse depressie en demp entoesiasme, asook pogings van vernuwing.

Die konsep “entropie" is iets waarvan veral ons groter politieke partye kennis moet neem. Entropie beskryf die toestand wanneer dinge uitmekaar begin val – by wyse van spreke die gebreekte-ruit-sindroom wat die voorspel is van 'n gebou wat inmekaar gaan tuimel as dit nie meer in stand gehou word nie. Dit is oorspronklik 'n termodinamiese term oor die gedrag van hitte, maar in die algemeen beskryf dit die neiging van energie om in enige geslote sisteem mettertyd af te neem en 'n mindere uitwerking te hê.

Ons politieke partye ag hulle eie belange in so 'n mate belangriker as hul kiesers s’n dat dit teenstrydig daarmee geword het. Hul ideologiese doelstellings eerder as praktiese oorwegings onttrek energie van ons verkiesingstelsel en gee aanleiding tot 'n totalitêre demokrasie wat pogings vir verandering in die kiem smoor...