Tragedie van ’n gesinsmoord: Hoe dit daarop neergekom het

DIT kan nie betwis word dat hy swaar grootgeword het nie, en om die waarheid te sê het hy eintlik maar net oorleef in ’n wêreld waar die statistieke van die begin af teen hom was. Soos sy ouers ook net-net oorleef het, maar op ’n ander manier. Sy pa wat so gedrink het, is gereeld afgedank. Dan moes hulle trek na waar daar werk was.

Hy was in vyf laerskole en drie hoërskole, en elke keer het sy ma se woedebuie vir sy pa, asook sy pa se versugting na die bottel saam getrek. Hy was gelukkig sterk en vinnig en kon met ’n paar prestasies op die sportveld homself op ’n manier handhaaf tussen al die skole. Ná afloop van die meeste van die byeenkomste, in die skoolbus, het hy voorgegee dat hy nie honger of dors is nie. In die oë van die ander kinders, wat sakgeld gehad het om eetgoed en koeldrank te kon koop, het hy taai en in beheer voorgekom.

Dit was moeilik vir hom om vakansiewerk te kry, want netnou is hy soos sy pa en mens weet nie of mens hom kan vertrou nie, het die winkeliers op die dorp geredeneer. Hy kon die spanning by sy ma aanvoel as sy pa, soos gewoonlik ná ’n jaar of twee, begin laat opdaag by die werk. Hy het die koeverte met laaste aanmanings geken, en ook die wegkruip agter toegetrekte gordyne as die skuldinvorderaars aan die deur klop...