Die lewe deur ’n filosofiese lens

Ek is die tipe persoon wat minstens een keer ’n jaar die konsep van hermeneutiek moet gaan opsoek. Hoekom? Omdat ek, ondanks die talle kere wat ek hermeneutiek in my daaglikse lewe beoefen, steeds nie die woord self onder die knie kan kry nie. Seker omdat ek my jaarliks in dieselfde definisie vasloop: “Hermeneutiek is die gebruik van hermeneutiese metodes.” Oukei.

Lag of gaap maar as jy wil, maar filosofie – die totale konsep – is onderliggend aan talle aspekte van die moderne lewe. Tog is die blote gedagte daaraan soms net te recherché.

Daar is nie ’n oorvloed mense wat te veel oor filosofie wil nadink nie. Nie as jy eintlik net in die tyd van Covid-19 sit en wonder hoekom daar ewe skielik so baie Kerspartytjies in jou dagboek is en jy nie die vaagste benul het hoe jy dit in hierdie tye gaan oorleef nie...