Name: Die gebakte pere van Van Holenharen tot Koek, Biscuit en Mossie

NAME se belang word dikwels oordryf of gepolitiseer. Maar naamgewing se gevolge moet nie misken word nie.

Toe omtrent alles onder Napoleontiese invloed in Europa gestandaardiseer is, insluitende vanne, het party Hollanders 'n bespotting daarvan probeer maak. Vandag sit hul nageslag nog met die gebakte pere van Poggenpoel, Benoudeboude, Hogenboezem, Van Holenharen, Piel, Beezhold, Van Moerkerken, Hoenderdos, Schietekat, ens.

Jou naam speel tog 'n rol, al is dit in jou onderbewussyn, in wie jy is. Geen wonder dat die Hollanders sulke siniese mense uitgedraai het nie. Maar partymaal wonder jy of dit nou die hoender of die eier is wat eerste gekom het. Waarom het ons mense, wanneer hulle Europese name by hul Afrika-name gevoeg het, so dikwels vernederende name gekies? Met ons geliefde Arch se dood is ons weer herinner dat een van sy ma se name Mavoertsek was. Mens wonder of dit ook 'n rol by sy latere Botho-filosofie gespeel het, saam met insidente soos toe Vader Huddlestone sy hoed vir haar gelig het – naamlik dat inklusiwiteit goddelik is, en dit dus godlasterlik is om jou medemens te verag. ..