Hoe herstel jy nadat jy R125 biljoen verloor het?

VIR ’n man wat in September volgende jaar 80 word, het Christo Wiese nog ’n redelike huppel in sy stap. Maar hy het min oor in sy portefeulje. Sedert hy net vier jaar gelede Suid-Afrika se rykste man was, raam Financial Mail dat die waarde van sy beleggings in JSE-genoteerde maatskappye met 93% gedaal het – ’n skaars denkbare R125 biljoen het verdwyn.

Sy belang in die beleggingsmaatskappy Brait, wat Virgin Active besit, het van R23.2 biljoen tot net meer as R1 biljoen gedaal, terwyl die maatskappy se aandeelprys met 97% gedaal het; die waarde van sy aandele in die nywerheidsmaatskappy Invicta het met meer as 80% tot R397 miljoen teruggesak; en sy besit in die eiendomsmaatskappy Tradehold is nou byna ’n derde van die R2.93 biljoen wat dit in 2016 was.

Selfs Wiese se prima belegging in Shoprite het met byna twee derdes gedaal tot R6.3 biljoen. Dié kleinhandelgroep se prys het intussen gehalveer namate Suid-Afrika se ekonomie verswak en winsgewende markte soos dié in Nigerië gespartel het, maar Wiese moes ook ’n gedeelte van sy belang verkoop om gate elders toe te stop...