Michael Jordaan: Suid-Afrika se goue seun van innovering

1989. 'n Stormagtige tyd op die Stellenbosch-kampus met optogte en sitstakings en studentebesoeke aan die ANC in Lusaka. In 'n kelderkamer langs die studentekoerant se kantoor het die bestuur van die Stellenbosse Aktuele Aangeleentheidskring vergader, 'n organisasie wat toe reeds 50 jaar oud was en gesprekvoering op die kampus bevorder het.

Michael Jordaan was deel van die keldergroepie wat daardie jaar vir onder andere Anton Lubowski, Van Zyl Slabbert en Rian Malan (wat toe net sy memoires, My Traitor's Heart, geskryf het) kampus toe genooi het.

Hy was 'n leftie, maar nie 'n rumoerige aktivis soos die res van ons nie. Ek onthou hom vir sy onberispelike maniere en skerp sin vir humour. Stil, maar met onmiskenbare charisma. En slim – soos een van ons gemeenskaplike vriende sê: “slimmer as die hele lot van ons saam"...