Gaan geniet jou barakat by die bioskoop, kanalla!

VROEËR vanjaar skryf die bekroonde Hollywood-rolprentmaker Martin Scorsese ’n breedvoerige opstel, Il Maestro: Federico Fellini and the lost magic of cinema in Harper’s Magazine. Hierin bespreek hy weer sy teenkanting teen stromingsdienste en die afgryslike leegloop van fliekteaters oor die hele wêreld heen.

Scorsese voer aan dat stromingsdienste verantwoordelik gaan wees vir die vervlakking van die rolprentkuns net soos alles in die media en vermaakbedryf deesdae tot content gereduseer word. Moenie eens praat van die algoritmes wat ons lewe op ’n manier regeer nie! Met die werke van die Italiaanse rolprentmaker Fellini as sy invalshoek, sê hy dat ons weer moet besin oor wat “cinema” is en wat dit nié is nie.

“Federico Fellini is a good place to start. You can say a lot of things about Fellini movies, but there is one thing that is incontestable: they are cinema,” sluit hy af...