Met dapper en stapper deur Lesotho

“JY het niks hier verloor nie.”

Pa het altyd so gesê wanneer ek soos ’n lam vlieg om hom rondgehang het terwyl hy besig was met iets en ek planloos staan en staar het. Dis nie dat ek hier is om rond te hang of planloos in die pad is nie. Ek het ’n plan: Ek gaan van Caledonspoort stap vir solank dit nodig is tot ek in die suide van Lesotho kom.

My plan is om nie honger te ly nie, nie koud te slaap nie, nie beroof of bedrieg of onnodig bedruk te word sou dit gebeur nie. ’n Normale strewe vir enigiemand in enige land. ..