Sybrand Lodewickus ‘Louis’ van Schoor – die dodelike veiligheidswag

IN die agterstrate en townships van die florerende Oos-Kaapse hawestad tussen Ciskei en Transkei was Sybrand Lodewickus “Louis" van Schoor berug as “Jesus" of “Ndevu" (Xhosa vir “Die Baard"). Die stad se polisie, waar hy 12 jaar lank sonder enige bevordering in die honde-eenheid gewerk het, kon telling hou van sy doodskote.

Die speurtak was immers elke keer op die toneel nadat Van Schoor 'n “positiewe stil-alarm" as veiligheidswag van sy eie maatskappy, Flash Security, met raakskote beantwoord het. Die moord-en-roof-tak is sover bekend nooit ingeroep om die saak op te volg nie.

In die informele ondersoeke daarna in die landdroshof is sy beroepe op selfverdediging en Art 49 (2) van die Strafproseswet aanvaar. Die wet maak daarvoor voorsiening dat ’n individu 'n persoon wat probeer ontsnap nadat hy 'n oortreding begaan het, kan skiet en/of doodskiet...

Deel