Sal Bob my ma in die hiernamaals herken?

EK droom nou die aand ek sou my ma hemel toe kon bel, maar ek het die nommer verloor. Dis nou in die droom. In die regte lewe het hulle my geblok.

Die droom het saamgeval met Bob Dylan se verjaardag. Hy is 81, die ouderdom waarop my ma uitgeklok het. My ma was baie trots, die keer toe sy op TV sien sy het Charles Atlas, ’n fiksheidsmaniak, verbygesteek. Hy’s op 78 die ewigheid in.

By my ma se roudiens, 15 jaar gelede, het die predikant mooi goed van haar gesê. Sy was ’n liefdevolle ma en ouma en al daai, sonder ’n krieseltjie gemeenheid in haar hart, ensovoorts. Dit het my tot diepe nadenke gestem. Hoe het my ma, tussen die weldade onder die siekes en armes waarvan die prediker gepraat het, tyd gevind om 30 Stuyvesants op ’n dag te rook en al daai reruns van The Jerry Springer Show te kyk?..