Waarom al dié absurde spoke teen Pravin Gordhan opgejaag word

STEL jou voor: Pravin Gordhan as die skurk in ’n James Bond-fliek, al strelende aan ’n enorme kat op sy skoot terwyl hy sy planne bekook om maatskappye in staatsbesit te privatiseer en pres. Cyril Ramaphosa se toutjies te trek. Daar is geen teken van die onversetlike stryder teen apartheid en die aktivis vir vryheid en demokrasie nie.

Pleks daarvan sien ons die vaandeldraer van witmonopoliekapitaal; die vernietiger van swart mense se loopbane. Hy het biljoene in Kanadese bankrekenings en ’n deftige blyplek in die Pretoriase spogbuurt Waterkloof.

Gordhan se bloedlyn ken geen perke nie – hy’s familie van alle Indiërs in Suid-Afrika, veral dié in die regbank. Hy’s agter die skerms die hanteerder van die aanklaerbaas Shamila Batohi, en die meesterbrein agter Suid-Afrika se media. Hy het eens op ’n tyd ’n bose eenheid in die belastingdiens bedryf wat op elke politikus van hier tot in Kaïro gespioeneer het...