Recce met MIV oplaas in die hof oor onbeskermde seks met ‘Korporaal X’

DIE slagoffer se saak word deur AfriForum se private vervolgingseenheid en advv. Gerrie Nel en Phyllis Vorster hanteer nadat die nasionale vervolgingsgesag (NVG) noodgedwonge vroeër nie met die vervolging kon voortgaan nie. Sover vasgestel kon word, sal dit slegs die derde keer in die Suid-Afrikaanse regsgeskiedenis wees dat ’n man vervolg word weens poging tot moord in die vorm van MIV-besmetting.

Terwyl die staat en ’n ondersoekbeampte van die polisie die aanvanklike saak hanteer het, het die weermag eenvoudig nie met enige van die dokumentasie en verklarings vorendag gekom wat die staat nodig gehad het om die saak te kon bewys nie.

Korporaal X, soos sy vir die oomblik genoem word, het dus by Nel om hulp gaan aanklop, waarna dié se eenheid in samewerking met die NVG en Marian van der Merwe, senior aanklaer by die Pretoriase landdroshof, die saak hofgereed gekry het...