Vrot verslae, maar amptenare en raadslede baljaar in die geld

INFRASTRUKTUUR soos krag-, water- en rioolnetwerke oor die land heen stort in duie, maar munisipaliteite het in die afgelope boekjaar nie eens 60% van die kapitaalbegroting daarvoor bestee nie. Bykans 90% van die begroting vir munisipale salarisse is egter wel uitgegee. Dít beteken dat vir elke rand wat aan salarisse bestee is, net 37 sent aan infrastruktuur gegaan het. 

Dit is oor probleme soos dié dat die nasionale tesourie nou munisipaliteite gaan dwing om hul begrotings en finansiële maandeindes in hul verslagdoening in te sluit – want sonder behoorlike finansiële verslagdoening kan syfers én prosesse gemanipuleer word en is dit makliker om weg te kom met bedrog, korrupsie, onreëlmatige en onregmatige besteding.

Munisipaliteite moes al sedert 1 Julie 2017 aan regulasies oor die maandelikse verslagdoening van hul inkomste en uitgawes voldoen. Teen die einde van die mees onlangse boekjaar, op 30 Junie, het die nasionale tesourie weer eens beklemtoon hoe sekere munisipaliteite hulle eenvoudig afvee aan wetlike vereistes rakende verslagdoening...