Woede onder dié 600,000 kiesers kan sterk seine na die ANC stuur

DIE belangrikste kwessies in die komende tussenverkiesings is die hantering van die Covid-pandemie deur die regering, verdere onthullings van korrupsie voor die Zondo-kommissie (https://www.vryeweekblad.com/search/?query=zondo) van ondersoek na staatskaping, grootskaalse werksverliese weens ’n ekonomie wat voor die uitbraak van die pandemie reeds aan ’t krimp was, en die ineenstorting van dienslewering by plaaslike munisipaliteite (baie waar van die verkiesings gehou sal word).

Tussenverkiesings word gehou in die Noord-Kaap (20), in die Oos-Kaap (19), Gauteng (15), KwaZulu-Natal (12), die Wes-Kaap (11), Noordwes (6), Mpumalanga (5) en vier elk in die Vrystaat en Limpopo. Die groot getal verkiesings in die Noord-Kaap is weens die ontbinding van die munisipale rade in Renosterberg (Philipstown en Vanderkloof) en Phokwane (Hartswater, Pampierstad en Jan Kempdorp) deur die provinsie se premier, dr. Zamani Saul. By laasgenoemde twee munisipaliteite sal daar ook 12 proporsionele raadslede verkies word.

Meer as 600,000 geregistreerde kiesers woon in die 96 wyke wat na die stembus gaan. Dit is gelykstaande met ongeveer 1% van Suid-Afrika se totale bevolking, volgens Statistieke SA se nuutste beraming...