Denel: afgetakel tot in die grond in, en niemand gee ’n dooie duit om

DIE Guptas en hul gunsteling-luitenant, Salim Essa, was in 2018 al goed ingegrawe in die wapenvervaardiger se binnewerke. Dié eens trotse verskaffer van biljoene rande se wapentuig het immers jaarliks met die wêreld se bestes vergelyk, en die staatskapers het vinnig agtergekom dat daar gedurende apartheid uiters waardevolle intellektuele eiendom (IE) met bloedsweet tydens die Grensoorlogjare ontwikkel is.

Daar was eenvoudig nie elders ’n mynbestande pantservoertuig wat kon kers vashou by die Casspir en verwante modelle nie. Missieltegnologie, hommeltuie, die Rooivalk-aanvalshelikopter en natuurlik die G5- en G6-kanonne het jaarliks biljoene rande se winste vir Suid-Afrika verseker en werk aan duisende primêre en sekondêre kontrakteurs gelewer.

Dit was ook die primêre verskaffer van wapentuig en ammunisie aan die weermag, en waarsonder dié steeds nie kan klaarkom nie...