20 jaar met kragskepe ’n groter nagmerrie vir SA as stakende vliegtuigenjins

DAAR was verlede week groot kommer oor die nuus dat die enigste SAL-vlug (https://www.vryeweekblad.com/nuus-en-politiek/2021-03-23-sal-ramp-afgeweer-toe-airbus-se-blikbrein-ingryp-om-entstof-vlug-te-red/) wat in baie maande kon opstyg 'n buitengewoon gevaarlike oomblik beleef het, en dat 'n ongeluk slegs voorkom is danksy die vliegtuig se outomatiese stelsels wat ingeskop en gekeer het dat die enjin staak toe vliegtuig opgestyg het. Vliegongelukke is ware nagmerriemateriaal, so die openbare reaksie daarop was nie buitensporig nie. 

Maar daar was ander onlangse gebeure wat nog meer kommerwekkend is. Een daarvan is die idee dat daar vier kragskepe vir die volgende 20 jaar aan die Suid-Afrikaanse kus gaan ankergooi en gasse die lug in stuur teen 'n koste van R218 biljoen aan die verbruiker. 

Kragskepe is iets wat 'n mens assosieer met lande in 'n noodtoestand, onder beleg weens oorlog of rampe. Dis hoekom hulle in die verlede aan die kus van Soedan, Irak en Libanon en onderontwikkelde Afrikalande was. Hulle gooi nie anker aan die kus van suksesvolle, moderne ekonomieë nie. ..