‘Help ’n bietjie daar met my MBA’

MY mond hang wawyd oop. Op my skerm is ’n e-pos van ’n MBA-student aan een van Suid-Afrika se mees vooraanstaande universiteite. Sy verduidelik sy en haar groep moet ’n paneelbespreking bywoon en ’n nuusverklaring van 500 woorde skryf as deel van een van hul modules. “My groep het besluit ons wil liewer ’n professionele persoon betaal om dit namens ons te doen,” sê haar e-pos woord vir woord. “Kan jy asseblief ’n kwotasie stuur? Ek heg die evalueringskriteria aan. Jy kan nog inligting oor die opdrag aanlyn kry by die kursus-uiteensetting, wat jou ook insigte sal gee in hierdie module.”

Ek lees die e-pos ’n tweede keer om seker te maak ek verstaan reg. Vra die student dat ek namens haar en haar medestudente bedrog pleeg? Ek pols my lewensmaat hieroor. Hy lig sy wenkbroue en vra of dit hoegenaamd eties is.

Ek besluit om oor my antwoord te slaap, en skryf ’n paar dae later vir haar dat ek stomgeslaan is. “Dis uiters ongewoon dat ’n groep volwasse studente ’n professionele skrywer vra om ’n opdrag namens hulle te skryf, en só ’n medepligtige te word aan wat net as bedrog bestempel kan word.” Ek voeg by ek het op LinkedIn gesien sy is ’n werknemer van die universiteit waar sy haar MBA doen. “My kollegas en kennisse wat vir universiteite en met MBA-programme werk, is dit almal eens dat jou versoek hoogs oneties is. Ek stel voor jy skryf self die stuk.”..