Die mes, die geel handskoene en Marike de Klerk se laaste uur

“EK wil eerstens sê, Johanna, dat ek saam met jou geskok en hartseer is oor alles wat jou oorgekom het. Hierdie brief is bedoel om my arms om jou te slaan van oor die oseaan, om vir jou ’n susterlike druk te gee en vir jou te sê dat ek jou emosies verstaan.”

Só lui een van die paragrawe uit ’n brief vol liefde en bemoediging wat Marike de Klerk (64) minder as ’n uur voor haar moord aan ’n vriendin in Nederland geskryf het. Presies om 23:12 faks sy die brief aan Johanna van Rooÿen, by wie borskanker toe pas gediagnoseer is. De Klerk, wat ook borskanker gehad het, het na haar uitgereik.

Teen die tyd dat sy die brief aan haar vriendin faks, is die 22-jarige Luyanda Mboniswa, ’n veiligheidswag by De Klerk se Dolphin Beach-woonstelkompleks in Table View, reeds in ’n metertaxi onderweg van Khayelitsha om haar te gaan vermoor...