Quinny gee Proteas die bybie-blues

DIS ’n nuwe jaar en dis soort van ’n ding om voorspellings te waag van wat met dié of dáái gaan gebeur. Die probleem is dat ek feitlik niks van die meeste sportsoorte af weet nie. Aan die ander kant skryf ek nou al 40 jaar lank aan en af oor sport, en onkunde het my nog nooit voorheen teruggehou nie, so hoekom sou dit nou? Dit het amper ’n tradisie geword, en vir tradisie het ek die allergrootste respek, mits ek iets daaruit kan score.

En, kan jy nou meer, daar gooi Quinton de Kock vir my ’n reddingsboei. Hy tree uit as toetsspeler op 29, met seker maklik sewe of agt goeie krieketjare voor hom.

Mens moes dit eintlik sien kom het. Die twee houe waarmee hy in die eerste toets teen Indië sy paaltjie weggesmyt het, hoort nie by iemand wat hoër as nommer 11 kolf nie. Hy sou die wedstryd vir Suid-Afrika kon gewen het. Ek dink dis Daryll Cullinan wat daai houe op CricInfo as “T20-shots” beskryf het. Enigeen wat al vir Quinny op sy stukke in T20 sien speel het, weet Cullinan was besonder gulhartig: Non-shots sou nader aan die kol wees, behalwe dat jou gemiddelde non ’n beter job daarvan sou maak...

DEEL