TikTok, Sinofuturisme en die siel van Chinese innovasie

“HULLE het in die ou dae dooies in lakens toegedraai en hier kom begrawe,” sê die DiDi-bestuurder vir my in ’n kenmerkende Beijing-aksent; “buiten dit was daar haas niks in Changping toe ek ’n kind was nie.”

Dit was in 2016, die jaar toe Uber China die wit vlag gehys het ná ’n duur wedywering met sy Chinese eweknie DiDi en deur laasgenoemde uitgekoop is. Ek en my DiDi-bestuurder was besig om die tyd te verwyl in ’n daaglikse verkeersknoop wat ’n mens tyd gegee het om Beijing se noordelike Changping-distrik deeglik te aanskou: metrostasies, blokke nuwe $500,000-woonstelletjies, arm migrantewerkers wat gebraaide patats op straat verkoop, Bulgari-reklameborde, en ’n paar kilometer suid, China se uitdaging van Silicon Valley.

Die distrik van Zhongguancun in Beijing is in die 1980's geoormerk as ’n staatsgeborgde geografiese sone vir die klassieke driemag van innovasie wat Boston en Silicon Valley goed gedien het: die staat, hoër onderrig en privaat nywerheid wat saamwerk om die nuutste tegnologie te ontwikkel. Maar waar die Amerikaanse driemag ongetwyfeld gelei is deur Amerikaanse nywerheid, het die staat dit in Zhongguancun gedoen...