Klein Saterdag | Oorloë en onstuimigheid en ’n klein bietjie pret

Mosambiek

Volgens die Mosambiek-kenner Joseph Hanlon (https://clubofmozambique.com/news/cabo-delgado-war-expands-as-both-side-grow-stronger-by-joseph-hanlon-221725/) verbeter die Rwandese, Mosambiekse en SAOG-soldate se optrede toenemend en slaag hulle daarin om die guerrillas uitmekaar te jaag. Ironies genoeg veroorsaak dit helaas dat die stryd na ander dele van Cabo Delgado uitbrei en dus tot meer interne vlugtelinge lei, soos vervat in die Verenigde Nasies se Hoëkommissariaat vir Vlugtelinge (VNHKV) se jongste verslag (https://reliefweb.int/report/mozambique/unhcr-mozambique-fact-sheet-june-2022), wat die syfer op byna 950,000 plaas.

Die militêre magte is nie in staat om die distrikte Mocímboa da Praia en Palma veilig te hou nie, en dit vertraag enige kans wat Total het om hul operasies te hervat tot 2023 (op die vroegste). Dit is ’n groterwordende guerrilla-oorlog, met aansienlike gevegte wat voortduur in Macomia en Ancuabe, sowel as Mocímboa da Praia. Nangade, op die grens met Tanzanië, is vir die eerste keer deur die guerrillas aangeval. Tussen 1 Junie en 22 Julie vanjaar was daar gemiddeld twee gevegte per dag met albei kante wat suksesvolle aanvalle op ’n basis van die ander kant rapporteer...