OP 5 Julie 1994 om 10:35 is sy gebore. My eersteling. Dit was harde werk om die baba in die lewe te bring, maar die ginekoloog en pediater en kraamsuster was bevoeg en die pa het gedoen wat hy kon. Ek was net vier uur lank in die groen kraamkamer. Dis glo ’n merkwaardige tydsbestek.

Terug in die saal vol moeders hoog op estrogeen, op ’n kliniese skoon bed, bly ek verbaas. Die ballon van my onlangse maag is opeens weg. Planeet Maag is ontruk aan die heelal, ek dryf al verder daarvan weg. Ek voel ontneem van iets, maar is nogal moeg en kan nie hard genoeg dink daaroor nie.

Nadat die kindjie geweeg en gemeet en nie te lig bevind is nie, is sy gebad. Iemand het haar aangetrek, in ’n Peter Rabbit-ontvangsdoek toegedraai en na my toe gebring. Ons het haar ’n naam gegee wat ek in my standerdvierjaar tydens ’n skoolkonsert by ’n ander skool in ons dorp gehoor het...

DEEL