Hoe om ’n nuwe mediamaatskappy binne 16 dae op die been te bring

TOE John F. Kennedy in 1962 sê ons doen sekere dinge nie omdat dit maklik is nie, maar omdat dit moeilik is, kon hy net sowel gepraat het van ’n nuwe mediamaatskappy wat binne 16 dae geskep word, eerder as om ouens op die maan te laat land.

Ek weet nie van ouens maan toe stuur nie, maar ek weet nou wel wat dit verg om ’n nuwe mediamaatskappy binne ’n paar weke op die been te bring. Ek raai dit nie aan as jy 'n swak hart, algemeen broos ingesteldheid of, inderdaad, ’n lewe het nie.

Om die waarheid te sê as iemand my drie weke gelede gevra het wat ek dink die volgende interessante ding sal wees wat ek in my lewe sal doen, sou hierdie nie op die lys gewees het nie...