Vuur reën uit die hemele – want masjiene het so besluit

JY sal van naby moet kyk om die verskil te sien tussen die vliegmasjien wat in Maart 2020 in Libië selfstandig besluit het om ’n menslike teiken aan te val, en die soort kwadkoptertjie waarmee iemand soms op die stukkie oop grond aan die einde van jou straat speel.

Die insident in Libië het onlangs in ’n VN-verslag (https://undocs.org/S/2021/229) aan die lig gekom, het onder meer die tydskrif New Scientist (https://www.newscientist.com./article/2278852-drones-may-have-attacked-humans-fully-autonomously-for-the-first-time/)verlede week berig. Dit was waarskynlik die eerste keer dat sulke dreuntuie ’n menslike teiken sonder ’n spesifieke opdrag aangeval het.

Sommige berigte wil dit hê dat dit ’n enkele “rogue drone” was, maar in werklikheid was daar waarskynlik ’n hele aantal, en het hulle bloot presies gedoen wat hulle geprogrammeer was om te doen, sê die Veiligheidsraad van die VN se paneel van kenners oor Libië in die verslag. “Die dodelike outonome wapenstelsels [van die betrokke en soortgelyke tuigies] was geprogrammeer om teikens aan te val sonder dat ’n dataverbinding tussen die operateur en die munisie nodig was.”..