Sputla sê hy gaan eersdaags oorbodig wees; Haïti se premier bedank

Goeiemôre!

1. Kgosientsho “Sputla" Ramokgopa sê sy pos as minister van elektrisiteit sal teen die einde van die jaar nie meer nodig wees nie omdat die elektrisiteitskrisis teen daardie tyd opgelos sal wees, het Business Day berig.

2. Inwoners van 'n hostel in Diepkloof in Soweto was gister woedend toe burgemeester Kabelo Gwamanda 'n afspraak gekanselleer het. Gwamanda sou saam met City Power-amptenare 'n nuwe kragaansluiting amptelik aanskakel, maar het 'n uur voor die tyd gekanselleer omdat hy dringend elders aan die stad se verslegtende waterkrisis moes aandag gee.

3. Amptenare van die Stad Tshwane het as deel van 'n veldtog om agterstallige elektrisiteitsrekeninge in te vorder, afgekom op verskeie onwettige aansluitings in gegoede buurte soos Brooklyn, Waterkloof Glen en Elarduspark, het News24 berig.

4. Die DA in Ekurhuleni het die ANC en die EFF daarvan beskuldig dat hulle die mosie van wantroue in burgemeester Sivuyile Ngodwana vertraag het sodat hulle eers agteraf daaroor kon beraadslaag. Michael Waters van die DA het aan Newsroom Afrika gesê: “The ANC and the EFF are playing for time. They are trying to renegotiate their deal. The ANC is scared of the threats of Julius Malema that if they lose Ekurhuleni they will get kicked out of Johannesburg and other metros.” 

5. Anglo Wealth Shariah beweer in hofstukke wat in die Gautengse hooggeregshof in Johannesburg ingedien is dat Lonwabo Sambudla, die eksman van Jacob Zuma se dogter Duduzile, probeer om 'n Ferrari, 'n Rolls-Royce en 'n Bentley te verkoop wat nie aan hom behoort nie, maar wat hy by die maatskappy huur.

6. Haïti se premier Ariel Henry het bedank ná weke van toenemende chaos in dié Karibbiese eilandstaat, wat op die rand van ineenstorting staan. Henry het gister in 'n video-toespraak gesê sy regering sal mag opgee ná die instelling van 'n oorgangsraad: “Haïti het vrede nodig. Haïti het stabiliteit nodig.”

7. 'n Vrou van Nebraska het na bewering 'n fout met 'n vulstasie se beloningskaart uitgebuit om altesame $28 000 se petrol te kry sonder om daarvoor te betaal, het AP berig.

Daar is 'n waarskuwing oor swaar reën met moontlike vloede in dele van KwaZulu-Natal en Mpumalanga en 'n hoë brandgevaar in dele van die Oos- en Noord-Kaap, Noordwes, Vrystaat en Limpopo. Gauteng is deelsbewolk en baie warm. Die res van die land, behalwe die Wes-Kaap, kan buie en donderbuie verwag.

Kliek hier vir meer.

Maksimum temperature: Pretoria 34°C • Johannesburg 32°C • Mahikeng 33°C • Mbombela 30°C • Bloemfontein 34°C • Polokwane 35°C • Kimberley 35°C • Upington 36°C • Kaapstad 23°C • Gqeberha 24°C • Oos-Londen 26°C • Durban 27°C.

Willem Kempen | Regime-verandering van ’n heel ander soort

Of dit so bedoel was of nie, die DA se versoek aan die VSA (en indirek ook aan ander lande) om geld sodat meer waarnemers die komende verkiesing kan monitor, lyk soos 'n klap in die Onafhanklike Verkiesingskommissie se gesig. En dit gee skietgoed aan Jacob Zuma se MK Party, wat gister opgewonde die aas gevat het en tekere gegaan het oor die “treacherous" DA wat die VSA sou wou help om “regime change" in Suid-Afrika te bewerkstellig.

Die DA is reg dat ons geskiedenis van staatskaping wys waartoe Zuma en sy kamerade in staat is as hulle nie behoorlik dopgehou word nie, maar dit was nie slim om dit te laat lyk asof die VSA hiermee vertrou moet word nie. Die demokrasie is in sommige opsigte in groter gevaar in die VSA as wat dit in Suid-Afrika is.

'n Aantal mense het byvoorbeeld Vrydag by 'n byeenkoms van die Republikeinse party in Kansas betaal om 'n rubberpop wat soos Joe Biden lyk te kon skop of slaan. Donald Trump se skoondogter, Lara Trump, is sedert Maandag medevoorsitter van die Republican National Committee, wat reeds begin het met die proses om mense weg te werk wat nie as Trump-lojaliste gesien word nie. Een bron het na dié proses as 'n “absolute bloodbath" verwys.

As Trump nie huiwer om sulke dinge aan sy eie partygenote te doen nie, dink net wat hy aan die res van die land gaan probeer doen die dag as hy sy tweede intrek in die Withuis neem.

’n Meesterplan om die aarde te beërwe

Hoe word mens 'n profeet? Ek vra, want ek sien annerdag in Joburg 'n billboard vir 'n ou wat homself Prophet Thabane of so iets roep. Met 'n foto van hom in wat na 'n baie duur swart pak klere lyk, en waar hy sy ken op imponerende wyse so tussen sy duim en wysvinger vashou. Niks se geskeurde gewaad in earthy tones soos Jeremia en daai manne nie.

Die punt is, dit lyk vir my na 'n lonende besigheid om 'n profeet te wees. Meer so as byvoorbeeld vir ons plaaslike pastore, wat, minstens te oordeel na hulle waargenome besteding aan buitelug-reklame, nie in dieselfde mate met materiële gawes van bo bedrup word soos die profete nie.

Dalk is daar een of ander hiërargie ter sprake, soos in jy moet eers vir 'n paar jaar 'n pastoor wees en 'n paar kursusse doen voor jy kan upgrade na 'n profeet toe. Of dalk durf jy jouself bloot nie 'n profeet noem as jy nie enige profesieë het om te verkondig nie.

Ek het eers gedink die verskil tussen 'n profeet en 'n pastoor het iets te doen met die vermoë om die verlorenes geredde, die dooies lewend, die siekes gesond, die armes welvarend, of die belastes belastingvry te maak, maar as dít waar is, is daar 'n helse klomp pastore wat glad nie hulle plek ken nie.

Wat wel skynbaar waar is, is die ou gesegde dat 'n profeet nie in sy eie land geëer word nie. Dit verklaar dalk waarom jou tipiese Gautengse profeet uit Zimbabwe of Nigerië kom, en hopelik ook waarom plaaslike profetiese talent so skaars is in Johannesburg of Pretoria – ons ouens is dan seker elders in plekke soos Kigali en Lagos aan die profeseer. Die enigste ander moontlike verklaring is dat Suid-Afrika nie deesdae soveel profete oplewer soos ander lande nie, en dít kan tog seker nie wees nie.

Ons is nie die enigste land waar die balans tussen profete en pastore histories hewig na laasgenoemde oorhel nie. Die VSA, daardie konstante bron van teologiese vernuwing, het byvoorbeeld in onlangse tye 'n merkbare tekort aan profete gehad. Die Amerikaners is tradisioneel sterk op evangeliste en televangeliste en pastore en so aan, maar andersins het hulle min of meer Peak Prophet bereik toe Joseph Smith van Mormone-faam “dood" is, en dit was al meer as 180 jaar gelede. (Bygesê, volgens Smith het dit gewemel van die profete op die Amerikaanse kontinent voor die wit mense daar aangekom het. Go figure.)

In elk geval, die trepidasie oor die Covid-pandemie het die VSA se profetiese geledere 'n stewige hupstoot gegee. Een van die nuwe sterre wat in daardie tyd die blinkste aan die profetiese uitspansel begin skyn het, is ene Cindy Jacobs, wat haarself beskryf as “a prophet, speaker, teacher, and author with a heart for discipling nations in the areas of prayer and the prophetic".

Cindy en Mike Jacobs is 'n husband-and-wife-team wat oënskynlik die uitsondering is op die reël dat professionele Amerikaanse evangeliste nie altyd die sewende gebod met dieselfde godvresende erns as die res hoef te bejeën nie. Selfs meer verfrissend is dat Prophet Cindy hoër op in die pastorale rangorde as haar man is, en dat arme Mike geen aanspraak het op profeet-status nie. (Sou 'n man nog die hoof van die huishouding moet wees as sy vrou 'n profeet is?)

Hul webwerf gee ook 'n leidraad oor hoe sy 'n profeet geword het: “At nine years old, the Lord called Cindy when He urged her to read Psalm 2:8: ‘Ask of me the nations for your inheritance, and the ends of the world for your possession.'”

En verder: “She has been recognized by Charisma magazine as one of their ‘40 People Who Radically Changed Our World' and is listed in the Who's Who Among American Women. Cindy has also been recognized among the top 50 leaders in the world who are a friend of Israel."

Waaruit ons 'n hele paar dinge oor Amerikaners in die algemeen en Amerikaanse profete in die besonder kan aflei, vermoed ek. Soos dat minstens vroulike profete tóg soms in hulle eie land ook geëer word.

♦ VWB ♦

NEEM DEEL AAN DIE GESPREK: Gaan na heel onder op hierdie bladsy om op hierdie artikel kommentaar te lewer. Ons hoor graag van jou.