Vroue wat nie aan verwagtings voldoen nie

Die fantastiese mevrou Smit het in ’n swierige geskenkpakkie opgedaag met ’n blikkie suiglekkers met die boek se titel op daarby. Seën die uitgewers wat die ekstra myl stap. Help dit regtig? Ek sou so dink – ons almal se prys is maar laag. As kind wou ek net Jack & Jill-skoolskoene hê omdat daar ’n ballon in die skoendoos was.

Die boek is net so verleidelik soos die suiglekkers. Mevrou Smit is ’n unieke karakter in Afrikaans. Sy het iets van Sally Andrews se tannie Maria; geen-nonsies en blatant onelegant. Waar tannie Maria vellies dra, dra mevrou Smit Birkenstocks. Maar mevrou Smit is veel grinteriger as tannie Maria: Sy is ’n vrou met ’n witwarm humeur en ’n troebel verlede. Sy is vol geheime. Ná die dood van haar man, ’n gay swendelaar wat haar beste vriend was, erf sy ’n fortuin, maar allerlei ongure vennote sak soos aasvoëls daarop toe. Daarom laat sy dit in bates omsit: Krugerponde en klippies in ’n suiglekkerblikkie. Dit en ’n rewolwer word in haar groot, pienk handsak saamgedra. Sy is gevaarlik.

Sy eet alles wat sy haarself lewenslank ontsê het sodat sy lyf kan kry. Sy dra los, geblomde bloese en lang rompe om haar kurwes te versteek en knip haar hare kort en laat dit grys uitgroei. Sy wil onsigbaar wees...

DEEL