Twee plaaslike juwele wat flonker

OMDAT die aanbod in ’n boekwinkel so oorweldigend is, glip juwele maklik deur jou vingers – selfs as die voorblad jou verbeelding op loop sit, soos dié van Mirage. En soms het ons nie dieselfde soort lojaliteit teenoor plaaslike Engelse stemme as Afrikaanses nie. Wel, dit het in my hande beland.

Dis ’n roman van idees, drome, moontlikhede. Soos tyd is dit nie liniêr nie – alle oomblikke bestaan tegelykertyd; verlede en hede ontmoet, en toekoms. Daar is ’n herhalende Duitse aanhaling van Einstein wat min of meer beteken: Vir diegene wat die geheimenisse van fisika kan ontrafel, is tyd niks meer as ’n hardnekkige illusie nie.

Michael is ’n student wat ’n meesterstesis skryf oor ’n vrou wat ’n eeu gelede geleef het en een enkele boek geskryf het. Elizabeth Tenant het in die Karoo beland, by Sterfontein, waar die sterre naby en helder is. Haar boek is oor ’n seun, wie se naam ook Michael is, wat die maan wou vang om die leemte in sy hart te vul. Telkens wanneer hy dit opraap, versplinter dit – tot hy besef dat wat hy probeer vang net die weerspieëling van die maan op die water is: Jy kan nie die maan vang deur die rivier te botteleer nie. Later stik hy die sterre aanmekaar met silwer gare. Hierdie boek is ’n sleutel tot die roman en Michael se soeke...

DEEL