Los die foefies, ons soek stories

In Januarie skryf Max du Preez in Vrye Weekblad (https://www.vryeweekblad.com/boeke/2023-01-13-die-fobie-oor-ontspanningsliteratuur/) dat hy moeg is van foefies en truuks in fiksie. Oor sy vakansieleesstof skryf hy:

My gevoel was dat ek steeds ’n boeiende boek, ’n storie, wou lees, maar met darem meer om die lyf as net ’n spanningslyn en baie aksie. Karakters wat meer diepte het, die omgewing (kultureel, histories en fisiek) wat beter beskryf word, intelligente en outentieke dialoog, meer stof tot nadenke as net lekkerkry en vinnig klaar lees om by die ontknoping op die einde uit te kom.

Ek het ... die indruk gekry hulle wou hulle boeke meer kompleks en selfs ontoeganklik maak omdat dit die boeke as letterkunde van gehalte sou laat uitstaan – die vrees van “ligte” of “populêre” leesstof, “ontspanningsliteratuur” het by hulle gespook...