Tom Verlaine: ’n Genie wat geweier het om by die punk-reëls te hou

PUNK was nie veronderstel om kitaarhelde op te lewer nie. Virtuositeit is met ’n frons, met veragting begroet. Maar daar was een uitsondering: Tom Verlaine, die kitaargodheid wat op 28 Januarie op die ouderdom van 73 gesterf het.

Verlaine was een van die oorspronklike New York-punks, deel van die legendariese CBGB-nagklublandskap wat ook Blondie, Talking Heads, Ramones en Verlaine se vriendin en deeltydse minnaar, Patti Smith, ingesluit het.

Verlaine se klank was so suiwer dat dit mens kon laat bewe en huil. Luister na liedjies soos “Torn Curtain”, “Days”, of die ingewikkelde komposisie “Marquee Moon” waarvoor sy groep, Television, altyd onthou sal word. Dit behels meer as 10 minute van klankgeluksaligheid met ’n staccato-ritme en ’n vloeibare, effens neurotiese onderliggende melodie. Elke keer wanneer ek daarna luister (en ek het dit dikwels die afgelope paar dae gedoen), neem dit my reguit terug na New York se East Village. Maar daar is ook ’n Suid-Afrikaanse konneksie. Hou dus aan lees...