Die seuntjie in sepia teen die klipmuur in Clarens

EERSDAAGS verskyn Pieter P. Fourie se tweede boek, Ons skulde. Hy sê die skryfproses was anders as met sy debuut: “’n Hart is so groot soos ’n vuis was die uiteinde van ’n proses wat in Januarie 2017 begin het, toe die management coach by die werk voorgestel het dat ek iets kreatiefs doen om die rasionele bestuurskonteks op kantoor te balanseer – iets anders, suiwer vir pret.”

Toe hy ná amper vyf dekades van stilte die leuens en “huisdinge” begin verraai, kon hy nie ophou nie en het hy meer en meer onthou. “Daar was ’n punt toe HartVuis begin het om my te skryf, eerder as andersom. Ek weet dit klink airy-fairy, maar ek kan aan geen ander manier dink om daardie proses en koorsdroom te verklaar nie … geen skryfwerk sou moontlik gewees het voordat HartVuis daarop aangedring het om gehoor te word nie.”

Hy vertel hy het Ons skulde soos ’n projekbestuurder benader en die storielyn op ’n spreiblad uiteengesit: “’n Kompas eerder as ’n kaart om die spontaneïteit en die ‘hoog’ van kreatiwiteit te behou.”..