1. Die Suid-Afrikaanse Weerdiens het gewaarsku dat die El Niño-weerverskynsel in die komende maande gaan voortduur en ’n warmer en droër somer as gewoonlik gaan meebring. Die gevolglike styging in elektrisiteitsverbruik weens lugversorging en ander maatreëls teen die hitte sal ook die druk op Eskom laat toeneem, het die weerdiens gesê.
2. Die droogte in Kanada en die slegte weer in Europa kan lei tot buitengewone stygings in die internasionale prys van pasta, het groot produsente volgens Reuters gewaarsku. Die Italiaanse regering het in Mei ’n krisisvergadering hieroor belê nadat pastapryse met meer as dubbel die nasionale inflasiekoers gestyg het. Die wêreldwye produksie van durumkoring is tans op die laagste vlak die afgelope 22 jaar, wat Italië se pastaprodusente genoop het om hulle na ongewone verskaffers soos Türkiye te wend vir hul belangrikste bestanddeel.
3. Weermagoffisiere in Gaboen het gisteroggend in ’n staatsgreep die mag in dié land in Sentraal-Afrika oorgeneem slegs minute nadat aangekondig is dat pres. Ali Bongo Ondimba vir ’n derde termyn as staatshoof herkies is. Ondimba het sy pa, Omar Bongo, in 2009 as president opgevolg nadat dié sedert 1967 aan die bewind was, wat beteken dat Gaboen vir 56 jaar deur ’n Bongo gelei is. Genl. Brice Oligui Nguema het aan die Franse koerant Le Monde gesê hy en ander generaals sou gister vergader om die hoof van ’n oorgangsregering aan te wys.
4. Lesetja Kganyago, president van die Suid-Afrikaanse Reserwebank, het voor die parlement se staande komitee oor finansies die bank se ondersoek na Phala Phala verdedig. Kganyago het gesê in die ondersoek is bevind dat die $580 000 kontant wat in 2020 aan ’n bestuurder by die lodge oorhandig is, ’n “sekuriteitsdeposito” was en nie ’n finale betaling nie, wat beteken die transaksie is nie afgehandel nie en valutareëls is nie verbreek nie.
5. ’n Koeël wat gevind is op die misdaadtoneel waar die voormalige Bafana Bafana-doelwagter Senzo Meyiwa doodgeskiet is, is afgevuur met ’n geweer wat later gekry is in die huis van Mthobisi Mncube, een van die beskuldigdes in die saak. Getuienis hieroor is gister in die Gautengse hooggeregshof in Pretoria gelewer deur lt.kol. Christian Mangena, ’n ballistiekkenner in die polisie. Die vier ander beskuldigdes is Bongani Ntanzi, Muzikawukhulelwa Sibiya, Mthokoziseni Maphisa en Fisokuhle Ntuli.
6. Staatsbeheerde en genoteerde maatskappye sal ingevolge beoogde wysigings aan die Maatskappywet bykomende inligting oor die besoldiging van werknemers openbaar moet maak. Dit sluit in die gaping tussen die hoogste en laagste lone wat hulle betaal, en die gemiddelde sowel as die mediaanloon van alle werknemers. Ebrahim Patel, minister van handel, nywerheid en mededinging, het vandeesweek die betrokke parlementêre portefeuljekomitee oor die voorgestelde wysigings ingelig. Die komitee sal in Oktober openbare verhore oor die voorgestelde veranderings hou.
7. Die Kremlin het gister gesê Russiese ondersoekbeamptes oorweeg die moontlikheid dat die Wagner-grootbaas Yevgeny Prigozhin se vliegtuig met opset laat neerstort is, wat die eerste erkenning deur die Russiese regering is dat dit enigiets anders as ’n ongeluk kon gewees het. “Dit is duidelik dat verskillende weergawes [van wat gebeur het] oorweeg word, waaronder die weergawe – julle weet waarvan ons praat – dat dit, kom ons sê, ’n doelbewuste gruweldaad was,” het Dmitri Peskov, woordvoerder van die Kremlin, volgens Reuters aan verslaggewers gesê toe hy oor die ondersoek gevra is.
Om kommentaar te lewer op hierdie artikel, registreer (dis vinnig en gratis) of meld aan.
Lees eers Vrye Weekblad se Kommentaarbeleid voor jy kommentaar lewer.