Moody’s is verniet skepties; ons kán dit weer doen, en vinnig

SUID-AFRIKA gaan nie uit sy huidige groef kom as hy nie spog met die enorme hoeveelheid ervaring met konflikoplossing en die wysheid wat hy die afgelope 30 jaar opgebou het – en dit ook benut – nie.

Hoekom is die graderingsagentskap Moody’s skepties oor ons regering wat ’n ooreenkoms met vakbonde bereik het oor die besnoeiing van die openbare sektor se salarisrekening? Ná ons minister van finansies, Tito Mboweni, se begrotingsrede verlede week het die agentskap gesê: “Die owerhede het nog nie enige matiging in salarisse met die land se vakbonde bespreek nie, wat beslis ’n uitdaging gaan wees.”

Moody’s is skepties, want ons het nie eens die moeite gedoen om hulle te vertel hoe ons al in die verlede sulke probleme opgelos het of hulle probeer oortuig dat ons dit weer kan doen nie. Enige ander land sou vir die agentskap Suid-Afrika se beskikbare talent en ervaring uitwys om hierdie resultaat te lewer...