Zim se grondnuus is meestal fopnuus

IN werklikheid gee die staat klein stukkies grond terug aan minder as 100 voormalige boere (of hul erfgename) wat burgers is van sewe lande waarmee Zimbabwe beskermende beleggingsooreenkomste gehad het tydens die grondgrype in 2000.

Hulle gee ook grond terug aan 'n handjievol swart Zimbabwiese boere wie se grond afgevat is tydens die chaotiese grondgrype ná 2000. Hierdie effense teruggee van grond is vervat in 'n nuwe statutêre instrument wat verlede week gepubliseer is, byna 20 jaar nadat die grondchaos begin het.

Die wetgewing bepaal dat die eisers burgers van Oostenryk, Frankryk, Nederland, Duitsland, Swede, Maleisië en Mauritius moes wees toe hul grond in 2000 afgevat is. Dit sal verbasend wees as enige van hierdie voormalige boere en hul erfgename hul grond wil terug hê. Baie van die plase se infrastruktuur is gestroop – as enigiets staande gebly het, sal dit na alle waarskynlikheid teen groot koste herstel moet word. Dit is ook moontlik dat die oorspronklike plase opgedeel is vir tientalle Zanu-PF-ondersteuners, dus hierdie besetters sal verhuis en vergoed moet word vir enige infrastruktuur wat hulle opgerig het...